АНУ-ын алдартай реалити шоу болох “90 Day Fiancé” нэвтрүүлгийн од Таис Рамон өөрийн хуучин хамтрагч Патрик Мендестэй хүүхдийн асран хамгааллын асуудлаар шүүхийн танхимд нүүр тулахаар болжээ. Тус шоу нь өөр өөр улс орны иргэд гэрлэх визээр дамжуулан харилцаагаа хэрхэн бэхжүүлж буйг харуулдаг, үзэгчдийн дунд маш өндөр рейтингтэй нэвтрүүлэг юм.
TMZ агентлагийн олж авсан шүүхийн баримт бичгээс үзвэл, Таис Рамон Патрикийг 3 настай хүүхдийнхээ үндсэн асран хамгаалагчаар томилуулах гэсэн оролдлогыг нь эрс эсэргүүцэж байгаа аж. Тэрээр хүүхдийнхээ асран хамгааллыг өөрийн мэдэлд авахыг хүсэхийн зэрэгцээ Патрикийг хүүхдийн тэтгэмж болгон сар бүр тодорхой хэмжээний мөнгөн төлбөр төлөхийг шаардаж байна.
Хосуудын харилцаа шоуны үеэр ч, шоуны дараа ч олон нийтийн анхаарлын төвд байсаар ирсэн. Гэвч тэдний салалт ийнхүү хүүхдийн төлөөх хуулийн маргаан болон хувирч байгаа нь шүтэн бишрэгчдийг нь цочирдуулаад байна. Одоогоор Патрик Мендес энэхүү нэхэмжлэлийн талаар албан ёсны тайлбар хийгээгүй байгаа бөгөөд шүүх хурлын тов тодорхойгүй байна.
