Өмнөд Солонгосын алдарт BTS хамтлаг удахгүй гарах "ARIRANG" цомгийнхоо хоёр дахь сингл "NORMAL"-ыг сурталчлахын тулд хуучны арга буюу сонины зар ашиглаж байна. Тэд Сан-Францискогийн Chronicle болон Нью-Йоркийн Post сонинуудад "BTS 00-ын өрөөнд нууцлаг цугларалтын үеэр харагджээ" гэсэн гарчигтай содон заруудыг байршуулжээ.
Уг зард хамтлагийн долоон гишүүн болох RM, Jung Kook, V, Jimin, Suga, Jin болон j-hope нарыг 00-ын өрөөнд бие засаж байгаа мэт байрлалтайгаар харуулсан "цочирдом" гэрэл зургийг ашигласан байна. Зард "Долоон гишүүн гэнэтийн нөхцөл байдалд хамт байгааг харуулсан оройн цагийн гэрэл зургийн дараа олон асуулт урган гарч ирлээ. Энэхүү цугларалт нь бүрэн хэвийн (normal) байсан эсэхэд эргэлзэх хүмүүс байна" хэмээн бичжээ.
Хамтлагийн төлөөлөгч зурагтай холбоотой тайлбар өгөхөөс татгалзсан бөгөөд илүү дэлгэрэнгүй мэдээллийг баасан гарагт гаргахаа мэдэгдсэн байна. "NORMAL" дуу болон түүний клип баасан гарагт Spotify платформ дээр анхлан цацагдаж, ням гарагаас эхлэн бүх стриминг үйлчилгээнд орох юм.
Ryan Tedder-ийн продюсерлосон энэхүү дуу нь "гэрэлтүүлэг ба чимээгүй байдлын хоорондох орон зай" болон хамтлагийн гишүүдийн өдөр тутмын бодлыг илэрхийлдэг аж. "ARIRANG" цомгийн эхний сингл "SWIM" нь Billboard Hot 100 жагсаалтыг тэргүүлж байсан билээ.
BTS хамтлаг "ARIRANG" дэлхийн аялан тоглолтынхоо хүрээнд Францын Сент-Денис хотын Stade de France цэнгэлдэхэд тоглохын зэрэгцээ, ням гарагт Нью-Жерси мужийн MetLife цэнгэлдэх хүрээлэнд болох FIFA-гийн ДАШТ-ий хаалтын тоглолтын үеэр Justin Bieber, Madonna, Shakira нарын хамтаар тайзнаа гарах гэж байна.
