Их Британийн алдарт IDLES хамтлагийн дуучин Жо Талбот Испани улсад болсон Bilbao BBK Live 2026 наадмын үеэр Нью-Йоркийн алдарт Interpol хамтлагийн талаар бахархан ярьжээ. Наадмын сүүлийн өдөр тайзнаа гарсан Талбот үзэгчдэд хандан хэлэхдээ, Interpol бол өөрийг нь хөгжимчин болоход урам зориг өгсөн хамгийн гол хамтлагуудын нэг гэдгийг онцолсон байна.
Тэрээр "Биднийг гэрээсээ ийм хол байхад халуун дотноор хүлээж авсанд баярлалаа. Өөрийн шүтэн биширдэг хамтлагтай нэг тайзан дээр гарах нь миний хувьд мөрөөдөл байлаа" хэмээн сэтгэгдлээ хуваалцжээ. Interpol хамтлаг нь 2000-аад оны эхээр алдаршсан Америкийн пост-панк рок хамтлаг юм.
IDLES хамтлагийн хувьд энэ үдэш өөрсдийн шинэ дуу болох 'Levitator'-оор тоглолтоо эхлүүлсэн байна. Энэхүү дуу нь тэдний гаргахаар төлөвлөж буй зургаа дахь цомгийн нэг хэсэг байх төлөвтэй байгаа юм. Хамтлагийн гитарчин Марк Боуэний өгүүлснээр, тус хамтлаг шинэ цомог дээрээ ажиллахдаа илүү энгийн, гишүүд бүгд нэг өрөөнд цуглан хөгжмөө тоглодог уламжлалт арга барил руугаа эргэн орж байгаа ажээ.
Bilbao BBK Live 2026 наадам нь энэ жил 20 жилийн ойгоо тэмдэглэж байгаа бөгөөд олон улсын томоохон уран бүтээлчид болон Испанийн рэппер Деллафуэнте зэрэг олон авьяастнууд оролцсон баялаг хөтөлбөртэй болж өнгөрлөө.
