90-ээд оны алдарт альтернатив рок хамтлаг болох L7-ийн басс гитарчин Женнифер Финч тархины хорт хавдартай хэмээн оношлогдсон байна. Энэхүү харамсалтай мэдээг хамтлагийн гишүүд нь даваа гарагт олон нийтэд зарлажээ.
Тус хамтлаг хоёр сарын өмнө "The Last Hurrah Tour" хэмээх сүүлийн аялан тоглолтоо хийхээ зарлаад байсан бөгөөд аялан тоглолт аравдугаар сарын 6-нд Сан Диего хотоос эхлэх байв. Гэвч оношийн улмаас Женнифер Финч аялан тоглолтод оролцох боломжгүй болжээ. Хамтлагийн дуучин Донита Спаркс мэдэгдэлдээ, Женнифер өөрөө тэднийг аялан тоглолтоо үргэлжлүүлэхийг хүссэн болохыг дурдсан байна.
Донита Спаркс нэмж хэлэхдээ, "Бид бүгд энэ мэдээнд гүн цочролд орсон. Бид түүнийг хайр халамжаар хүрээлж, хувийн орон зайг нь хүндэтгэн, шаардлагатай тусламжийг үзүүлэхээр ажиллаж байна. Женнифер бол манай гэр бүлийн нэг хэсэг" гэжээ.
Эхэндээ эмчилгээ болон цацраг туяаны эмчилгээ хийлгэснээр Женнифер Финчийг хэвийн амьдралдаа эргэн орно гэж найдаж байсан ч урьдчилан тооцоолоогүй хүндрэлүүд үүсэж, олон удаагийн хагалгаанд орох шаардлагатай болсон байна. Үүний улмаас түүний биеийн байдал хүндэрч, хөдөлгөөний хязгаарлалттай болжээ.
Найз нөхөд болон гэр бүлийнхэн нь түүний эмчилгээ, нөхөн сэргээх болон асран хамгаалах үйлчилгээний өндөр зардлыг даахын тулд GoFundMe аяныг эхлүүлээд байна. Энэхүү хандив нь түүнийг 24 цагийн турш асрах сувилахуйн тусламж, эмнэлгийн зардал болон бусад нэн шаардлагатай зүйлсэд зарцуулагдах юм. R.E.M хамтлагийн Майкл Стайп хүртэл өөрийн цахим хуудсаараа дамжуулан энэхүү хандивын аяныг дэмжихийг уриалжээ.
