Дэлхий дахинд өндөр үнэлгээ авч буй “Only Murders in the Building” (Байранд гарсан аллага) цувралын шүтэн бишрэгчдэд зориулсан гайхалтай мэдээ ирлээ. Тус цувралын зургаадугаар улиралд алдарт жүжигчин Дэвид Теннант болон Никола Коклан нар нэгдэж байгааг NME эх сурвалж мэдээллээ. Одоогоор цувралын зураг авалт Их Британид үргэлжилж байна.
Дэвид Теннант нь “Doctor Who” цувралын 10 дахь Доктор болон “Good Omens” киноны дүрээрээ олон улсад танигдсан, Британийн чадварлаг жүжигчин билээ. Харин Никола Коклан нь Netflix-ийн хит “Bridgerton” цувралын Пенелопа Фезерингтон болон “Derry Girls” олон ангит киноны дүрээр үзэгчдийн хайрыг татсан, өдгөө хамгийн эрэлттэй жүжигчдийн нэг юм.
Энэхүү цуврал нь гэмт хэрэг, инээдмийн төрлийг хослуулсан өвөрмөц шийдлээрээ залуу үзэгчдийн дунд маш их алдартай. Стив Мартин, Мартин Шорт, Селена Гомес нарын гол дүрийг нь бүтээдэг энэ бүтээлд шинээр нэмэгдэж буй жүжигчид ямар дүр бүтээх нь одоогоор нууц хэвээр байна. Гэсэн хэдий ч Теннант болон Коклан нарын оролцоо цувралын чансааг улам өсгөх нь дамжиггүй.
Цувралын зураг авалт Их Британид хийгдэж байгаа нь үзэгчдийн дунд үйл явдал Нью-Йорк хотоос хальж, өөр орныг чиглэх болов уу гэсэн таамаглалыг төрүүлээд байна. Шинэ улирлын талаарх дэлгэрэнгүй мэдээлэл болон гарах хугацааг албан ёсоор удахгүй зарлах төлөвтэй байна.
