Хүүхэд байхдаа тоглодог байсан өнгө өнгийн шавар буюу Play-Doh брэнд насанд хүрэгчдэд зориулсан шинэ бүтээгдэхүүний цувралаа танилцууллаа. "Blooms by Play-Doh" нэртэй энэхүү шинэ цуврал нь өнгөлөг шавраар гоёл чимэглэлийн цэцгийн баглаа бүтээхэд зориулагдсан юм.
Цувралд багтаж буй иж бүрдлүүд нь цэцэг хийхэд шаардлагатай хэрэгслүүд, тусгай шавар, цэцгийн ваар болон бэлэн болсон бүтээлийг хадгалах зориулалттай шүршигч бодис зэргийг агуулдаг. Тухайлбал, Rosy Petite Bouquet, Wildflower Petite Bouquet, Meadow Flower Bouquet болон Garden Bouquet гэсэн сонголтуудтай бөгөөд үнэ нь 24.99 ам.доллароос 39.99 ам.долларын хооронд байна.
Эдгээр иж бүрдэл нь хэрэглэгчдэд цэцэг хэрхэн урлах талаарх зурагт зааврыг дагах боломжийг олгодог. Үүний тусламжтайгаар насанд хүрэгчид өөрсдийн гараар цэцэг урлаж, гэрийн болон ажлын ширээгээ чимэх боломжтой юм. Мөн цэцгийн үнэртэй шавраар хийсэн эдгээр бүтээл нь хатаж бэхэжсэнийхээ дараа удаан хугацаанд хэлбэрээ хадгалах зориулалттай ажээ.
Одоогоор энэхүү шинэ цувралыг Amazon, Walmart болон Target сүлжээ дэлгүүрүүдээс худалдан авах боломжтой байна.
