Нью-Йорк хотод төвтэй, NASDAQ биржид бүртгэлтэй Reservoir Media компани Латин Америкийн бие даасан хөгжмийн зах зээлд нөлөө бүхий Nacional Records лейбл болон түүний эгч компани болох Canciones Nacionales-ийн хэвлэлийн эрхийн хөрөнгийг худалдан авснаа албан ёсоор мэдэгдлээ.
Энэхүү хэлэлцээрийн хүрээнд хоёр тал хамтарсан төсөл хэрэгжүүлж, шинэ уран бүтээлчид болон дуу зохиогчдыг нэгтгэн, тэдний уран бүтээлийг хөгжүүлэхээр төлөвлөж байна. Reservoir компанийн ерөнхийлөгч бөгөөд үйл ажиллагаа хариуцсан захирал Релл Лафарг хэлэхдээ, "Сүүлийн хорин жилийн хугацаанд Nacional нь Латин Америкийн зах зээл дэх хамгийн нөлөө бүхий бие даасан хөгжмийн компаниудын нэг болж чадсан" хэмээн онцолжээ.
Nacional Records-ийг 2005 онд Лос-Анжелес хотод Томас Күүкман үүсгэн байгуулсан бөгөөд тус компани нь Латин Америкийн альтернатив хөгжмийн чиглэлээр үйл ажиллагаа явуулдаг гол хүч юм. Түүний удирдлага дор тус лейбл нь Ana Tijoux, Bomba Estéreo, Manu Chao зэрэг олон алдартай уран бүтээлчдийн уран бүтээлийг олон нийтэд хүргэж ирсэн түүхтэй. Мөн тус компанийн каталогид 100 гаруй Грэмми болон Латин Грэммийн шагнал, номинаци багтдаг байна.
Томас Күүкман энэхүү хамтын ажиллагааны талаар ярихдаа, "Бид Reservoir-ийн удирдлагуудтай эртнээс харилцаатай байж, бие биенийхээ ажилд хүндэтгэлтэй хандсаар ирсэн. Бидний хамтын ажиллагаа Латин Америкийн хөгжим болон соёлыг өргөжүүлэхэд чухал алхам болно гэдэгт итгэлтэй байна" гэжээ.
Reservoir нь 1900-аад оноос хойшхи дууны эрх болон мастер бичлэгүүдийг эзэмшдэг, дэлхийн хэмжээнд үйл ажиллагаа явуулдаг бие даасан хөгжмийн томоохон компаниудын нэг юм. Энэхүү хэлэлцээр нь тус компанийн Латин Америкийн хөгжмийн зах зээл дэх байр суурийг бэхжүүлэх стратегийн чухал алхам болж байна.
