АНУ-ын алдарт поп-рок хамтлаг болох Sixpence None the Richer-ийн басс гитарчин Жастин Кэри 50 насандаа таалал төгссөн харамсалтай мэдээлэл гарлаа. Тэрээр 90-ээд оны сүүлчээр дэлхий даяар хит болсон "Kiss Me", "There She Goes" зэрэг дуунуудаараа олонд танигдсан хамтлагийн бүрэлдэхүүнд олон жил хүчин зүтгэсэн уран бүтээлч юм.
Хамтлагийн гоцлол дуучин Ли Нэш өөрийн цахим хуудсаараа дамжуулан энэхүү гунигт мэдээг баталж, "Бид түүнийгээ маш их хайрладаг. Энэ бүхнийг үгээр илэрхийлэхэд дэндүү хэцүү ч, түүнийг хайрладаг олон хүн байгааг би мэдэж байна" хэмээн эмгэнэл илэрхийлжээ.
Sixpence None the Richer хамтлаг нь 1990-ээд оны үед поп болон христийн хөгжмийн ертөнцөд томоохон байр суурь эзэлж байсан бөгөөд Жастин Кэри тэдний хөгжмийн хэв маягийг бүрдүүлэхэд чухал үүрэг гүйцэтгэсэн нэгэн байсан юм. Хэдийгээр түүний нас барсан шалтгааныг албан ёсоор дэлгэрэнгүй мэдээлээгүй байгаа ч хөгжмийн ертөнцийнхөн болон шүтэн бишрэгчид нь түүний гэр бүл, хамт олонд гүн эмгэнэл илэрхийлсээр байна.
Түүний гэнэтийн од болсон нь олон мянган сонсогчдын хувьд хүнд цохилт болж байгаа бөгөөд түүний бүтээсэн аялгуу, хамтлагийнх нь дуунууд үе үеийн сонсогчдын зүрх сэтгэлд үлдэх нь гарцаагүй юм.
