Рок хөгжим сонирхогчдын хувьд гэнэтийн таатай үйл явдал боллоо. The Raconteurs хамтлаг алдарт дуучин, гитарчин Жэк Уайтын Нашвилл хотод хийсэн тоглолтын үеэр гэнэт тайзан дээр гарч ирэн, бараг долоон жилийн дараа анх удаагаа хамтдаа тоглосон байна.
Энэхүү тоглолт нь Нашвилл хотод шинээр нээгдсэн 4,400 хүний багтаамжтай The Truth танхимд болсон бөгөөд Жэк Уайтын дараалсан хоёр өдрийн тоглолтын хоёр дахь үдэш тохиожээ. Тоглолтын төгсгөлийн хэсэгт Жэк Уайт хамтлагийн гишүүд болох дуучин, гитарчин Брендан Бенсон, басс гитарчин Жэк Лоуренс болон бөмбөрчин Патрик Килер нарыг тайзнаа урьсан байна.
Тэд тайзан дээр гармагцаа 2006 оны анхны уран бүтээл болох ‘Steady, As She Goes’ дуугаа толилуулж, араас нь ‘Hands’, ‘Level’, ‘Broken Boy Soldier’ дуунуудаа дуулжээ. Харин үзүүлбэрээ 2008 оны хоёр дахь цомгийн ‘Carolina Drama’ дуугаар өндөрлүүлсэн байна.
Жэк Уайт тоглолтын өмнө өөрийн цахим хуудсаараа дамжуулан шүтэн бишрэгчдэдээ "гэнэтийн бэлэг байж магадгүй" хэмээн битүүхэн сануулж байсан юм. The Raconteurs хамтлагийн хувьд өмнө нь 2019 оны 12-р сард Хавайн Гонолулуд хамгийн сүүлд бүрэн бүрэлдэхүүнээрээ тоглож байжээ.
