Английн соул хөгжмийн Hot Chocolate хамтлагийн басс гитарчин, дуу зохиогч Тони Вилсон 89 насандаа хорвоогоос хальсныг Billboard сэтгүүл мэдээллээ.
Тони Вилсон нь 1968 онд Ямайк гаралтай британи дуучин Эррол Браун (Errol Brown)-тай хамтран Hot Chocolate хамтлагийг үүсгэн байгуулсан юм. Хамтлаг нь 1970-аад онд АНУ-ын хөгжмийн чартуудад амжилттай оролцсон, хар арьстнуудаас бүрдсэн анхны британи хамтлаг болж түүхэнд бичигдсэн.
Hot Chocolate хамтлагийн хамгийн алдартай дуунуудын нэг болсон “You Sexy Thing” нь 1975 онд Billboard Hot 100 чартыг тэргүүлж, хит болсон юм. Энэхүү дуу нь “The Full Monty” зэрэг олон кинонд ашиглагдаж, дахин дахин сэргээгдэж байсан билээ. Тони Вилсон нь Hot Chocolate хамтлагийн олон арван дууг зохиосон бөгөөд түүний хөгжмийн өв нь үеийн үед дамжин өвлөгдөх болно.
Тони Вилсоны гэр бүл, анд нөхдөд гүн эмгэнэл илэрхийлье. Түүний хөгжим бидний зүрх сэтгэлд үүрд мөнх орших болно.
