АНУ-ын нийгмийн даатгалын систем томоохон сорилттой тулгарч байна. Сүүлийн үеийн тооцооллоор тус улсын тэтгэврийн сангийн нөөц дуусахад ойртож байгаатай холбогдуулан ирээдүйд тэтгэвэр авагчдын сар бүр авах мөнгөн тэтгэмж 500 орчим ам.доллароор буурах эрсдэл үүсээд байгаа юм. Энэ нь Америкийн эдийн засаг болон хүн амын нийгмийн хамгаалалд ноцтой цохилт болохоор байна.
Энэхүү хүндрэлийг шийдвэрлэхийн тулд АНУ-ын хууль тогтоогчид Нийгмийн даатгал (Social Security) болон Эрүүл мэндийн даатгалын (Medicare) сангуудын санхүүгийн тогтвортой байдлыг хангах зорилготой хоёр намын хамтарсан тусгай комисс байгуулах санал гаргаад байна. АНУ-ын Нийгмийн даатгал нь тус улсын ахмад настнууд болон хөдөлмөрийн чадваргүй иргэдийн амьжиргааны гол эх үүсвэр болдог систем юм. Гэвч хүн амын насжилт нэмэгдэж, ажиллах хүчний харьцаа өөрчлөгдсөнөөр энэхүү системийн зардал орлогоосоо давж эхэлжээ.
Шинээр байгуулахаар төлөвлөж буй комисс нь улс төрийн талцалгүйгээр санхүүгийн шинэчлэл хийх, тэтгэврийн сангийн алдагдлыг бууруулах, иргэдийн тэтгэмжийг хамгаалах шийдлүүдийг боловсруулах үүрэгтэй. Хэрэв тодорхой арга хэмжээ авахгүй бол ирэх жилүүдэд тэтгэвэр авагчдын худалдан авах чадвар эрс буурч, энэ нь нийгмийн дундаж давхаргын амьдралд сөргөөр нөлөөлөх нь тодорхой байна.
Эдийн засагчид болон шинжээчдийн үзэж байгаагаар, энэ асуудал нь зөвхөн АНУ-ын дотоод асуудал биш бөгөөд дэлхийн эдийн засагт ч нөлөөлөхүйц хүчин зүйл юм. Учир нь АНУ-ын төсвийн бодлого, нийгмийн хамгааллын зардал нь дэлхийн санхүүгийн зах зээлд өөрийн гэсэн нөлөөтэй байдаг. Одоогийн байдлаар хоёр намын төлөөлөгчид уг комиссын бүтэц, эрх мэдлийн талаар хэлэлцэж байгаа бөгөөд нийгмийн даатгалын системийн ирээдүйг хэрхэн аврах нь анхаарлын төвд байна.
