АНУ-ын Ерөнхийлөгч асан Барак Обамагийн нэрэмжит “Obama Presidential Center”-ийн нээлтийн ажиллагаа тун удахгүй Чикаго хотноо болох гэж байна. Энэхүү түүхэн үйл явдлыг чимэхээр дэлхийн хөгжмийн ертөнцийн хамгийн том одод тайзнаа гарахаар болсныг Rolling Stone сэтгүүл мэдээллээ.
Нээлтийн арга хэмжээнд “Born in the U.S.A” дуугаараа алдаршсан рок хөгжмийн домог Брюс Спрингстин, Ирландын алдарт U2 хамтлаг, мөн соуль хөгжмийн хаан гэгддэг Стиви Уандер зэрэг олон улсад нэр хүндтэй уран бүтээлчид оролцож, ая дуугаа өргөх юм. Эдгээр уран бүтээлчид нь бүгд өөрсдийн салбартаа олон арван “Грэмми” шагнал хүртсэн, дэлхийн соёлын түүхэнд томоохон байр суурь эзэлдэг эрхмүүд билээ.
“Найдварын орон гэр нээлтээ хийхэд бэлэн боллоо” хэмээн төвийн удирдлагууд мэдэгдэлдээ дурджээ. Чикаго хотын Жэксон цэцэрлэгт хүрээлэнд байрлах энэхүү төв нь зөвхөн Барак Обамагийн ерөнхийлөгч байх үеийн түүхийг хадгалаад зогсохгүй, олон нийтийн боловсрол, соёлын нөлөөллийг дэмжих зорилготой юм.
Энэхүү арга хэмжээ нь дэлхий даяарх шүтэн бишрэгчдийн анхаарлыг татаж байгаа бөгөөд зөвхөн улс төрийн бус, урлаг соёлын томоохон үйл явдал болон тэмдэглэгдэхээр байна. Обамагийн гэр бүлийн санаачилгаар байгуулагдсан энэ төв нь ирээдүйн удирдагчид болон залуу үеийнхэнд урам зориг өгөх, нийгмийн өөрчлөлтийг дэмжих гол цэг байх болно гэж зохион байгуулагчид үзэж байна.
