Америкийн поп хөгжмийн ертөнцийн томоохон төлөөлөгчдийн нэг, дуучин, хөгжмийн зохиолч Барри Манилоу өнгөрсөн арванхоёрдугаар сард уушгины хавдартай гэж оношлогдсоноос хойш Лас Вегас хотод төлөвлөсөн тоглолтоо хэд хэдэн удаа хойшлуулаад байна.
Түүний баг өнгөрсөн долоо хоногт тавдугаар сард болох байсан тоглолтуудыг мөн хойшлуулж байгаа тухай мэдэгдэл гаргажээ. Мэдэгдэлд дуучны эрүүл мэндийн байдал сайжирч байгаа ч бүрэн эдгэрэхийн тулд нэмэлт амралт, эмчилгээ шаардлагатай байгааг онцолсон байна.
Барри Манилоу нь 1970-аад оноос эхлэн олон арван хит дууг бүтээж, дэлхий даяар сая сая хувь цомог борлуулсан, Grammy, Emmy, Tony зэрэг нэр хүндтэй шагнал хүртсэн уран бүтээлч юм. Түүний "Copacabana", "Mandy", "Could It Be Magic" зэрэг дуунууд нь өнөөг хүртэл сонсогчдын зүрх сэтгэлд хоногшсон хэвээр.
Залуу уншигчдын хувьд Барри Манилоу бол ээж, аав, эмээ, өвөөгийнх нь сонсох дуртай дуучин байж магадгүй. Гэхдээ түүний хөгжим нь цаг үеийн шалгуурыг давж, олон үеийнхэнд таалагдсаар байгаа билээ. Бид түүнд эрүүл энхийг хүсэн, тайзан дээр эргэн ирэхийг хүлээж байна. Тоглолтыг нь үзэхээр билет авсан хүмүүст билетийн мөнгийг буцаан олгох эсвэл өөр тоглолтод оролцох боломж олгох юм байна.
