АНУ-ын Сиэтл хотод төвтэй, биткойн олборлолтын үйлчилгээ үзүүлэгч “Luxor Technology” компани стратегийн хөрөнгө оруулалтын шатанд 16 сая ам.доллар татсанаа зарлалаа. Энэхүү хөрөнгө оруулалтын шатыг Чикагод төвтэй “CMT Group”-ийн венчур салбар болох “CMT Digital” тэргүүлж, “Canaan”, “MicroBT”, “Halo”, “Steelhead” болон сахиусан тэнгэр (angel) хөрөнгө оруулагчид оролцсон байна.
Энэхүү санхүүжилт нь Luxor-ийн есдүгээр сард эхлүүлсэн “Luxor AI” чиглэлийг өргөжүүлэх зорилготой аж. Тус салбар нь биткойн олборлолтод зориулан хөгжүүлсэн эрчим хүч, техник хангамж, програм хангамж болон тооцооллын худалдааны дэд бүтцээ хиймэл оюун (AI) ба өндөр хүчин чадалтай тооцоолол (HPC) руу чиглүүлэн тэлэх зорилготой юм.
Хөрөнгийг зарцуулах үндсэн чиглэлүүд
Компани шинээр татсан хөрөнгөө дараах дөрвөн үндсэн чиглэлд зарцуулахаар төлөвлөж байна:
- Өөрсдийн “agentic cloud” платформыг өргөжүүлэх (есдүгээр сарын байдлаар тус платформ дээр 1.8 сая ажлын ачаалал хийгдсэн),
- AI техник хангамжийн бизнесийн эргэлтийн хөрөнгийг санхүүжүүлэх,
- Тооцооллын дериватив арилжаа болон зах зээлийг бий болгох (market making) үйл ажиллагааг тэлэх,
- Инженер болон зах зээлд нэвтрэх багийн боловсон хүчнийг нэмж ажилд авах.
Luxor-ийн мэдээлснээр, тэдний техник хангамжийн брокерийн хэлтэс биткойн олборлолтын ASIC төхөөрөмжийн арилжаанд 1 тэрбум долларын гүйлгээ хийсэн бөгөөд эрчим хүчний салбар нь ERCOT болон SPP сүлжээгээр дамжуулан 75 мегаваттаас дээш ачааллыг хангадаг байна.
Тооцооллын зах зээлийн уялдаа холбоо
“CMT Digital”-ийн түнш Сэм Халлены үзэж буйгаар, Luxor тооцооллын ард байх эрчим хүч, дэд бүтцийн орчин болон эрсдэлийг удирдах санхүүгийн хэрэгслүүдийг сайн ойлгодог бөгөөд дижитал активын салбарт найман жилийн турш бий болгосон туршлагаа хиймэл оюунд ашиглаж байна.
Luxor-ийн гүйцэтгэх захирал бөгөөд үүсгэн байгуулагч Ник Хансен "Тооцооллын зах зээлүүд нэгдэж байна. Дижитал олборлолтод үйлчилж байсан ижил олборлогчид, эрчим хүчний байгууламжууд болон хөрөнгө одоо хиймэл оюуныг дэмжиж байна" хэмээн онцолжээ.
Үүнээс гадна, “CoinShares”-ийн мэдээллээр олон нийтэд нээлттэй биткойн олборлогчид гуравдугаар сарын эцэс гэхэд AI болон өндөр хүчин чадалтай тооцооллын чиглэлээр 70 тэрбум гаруй ам.долларын гэрээ байгуулаад байсан байна.
