Бразилийн цахим ертөнцийн од, зуун насласан инфлюэнсер Во до Сеу буюу “Тэнгэрийн эмээ” агсан 106 насандаа таалал төгссөн харамсалтай мэдээ цахим ертөнцөд тархаад байна. Тэрээр гэртээ хальтирч унасны улмаас толгойгоо гэмтээж, эмнэлгийн тусламж авсан ч амь насаа аварч чадаагүй аж.
Во до Сеу нь Бразилийн инфлюэнсер бөгөөд олон нийтийн сүлжээнд “Grandma From Heaven” буюу “Тэнгэрийн эмээ” гэдэг нэрээрээ алдартай байсан. Тэрээр өөрийн хөгжилтэй, урам зориг өгсөн контентуудаараа залуу үеийнхний зүрх сэтгэлийг эзэмдэж, олон мянган дагагчтай болсон юм. Түүний видеонууд нь ихэвчлэн өдөр тутмын амьдрал, ач зээ нартайгаа өнгөрүүлж буй цаг мөч, хоол хийх зэрэг энгийн хэрнээ дотно сэдвүүдийг хамардаг байв.
Түүний үхэл нь Бразилийн цахим ертөнцөд гүн эмгэнэл авчирч, дагагчид нь түүний дурсгалыг хүндэтгэн, түүний бүтээлүүдээс урам зориг авч байснаа дурсан бичиж байна. Во до Сеу нь урт наслахын нууц, амьдралыг хайрлах ухааныг залуу үедээ үлдээсэн үлгэр жишээ эмээ байлаа. Түүний гэр бүл, дотны хүмүүст гүн эмгэнэл илэрхийлье.
