Дэлхийн санхүүгийн зах зээлийн томоохон төвүүдийн нэг болох Их Британи улс крипто валютын зохицуулалтын тал дээр томоохон алхам хийхээр зэхэж байна. Тус улсын Санхүүгийн зохицуулах байгууллага (Financial Conduct Authority - FCA) нь жижиглэнгийн хөрөнгө оруулагчдад зориулсан сангуудад крипто хөрөнгийн оролцоог тодорхой хэмжээгээр зөвшөөрөх боломжийг хэлэлцэж эхэллээ.
FCA-ийн санал болгож буй энэхүү шинэ бодлогоор бол, хөрөнгө оруулалтын сангууд өөрсдийн нийт хөрөнгийн 10 хүртэлх хувийг крипто валютын зах зээлд байршуулах эрхтэй болох юм. Гэхдээ энэхүү үйл ажиллагаа нь тухайн сангийн үндсэн зорилго, хөрөнгө оруулалтын стратегитай нийцсэн байх ёстой бөгөөд хөрөнгө оруулагчдад ил тод мэдээлэгдсэн байх шаардлагатай аж. Энэ нь хөрөнгө оруулагчдыг эрсдэлээс хамгаалахын зэрэгцээ зах зээлийн шинэ боломжуудыг нээж өгөх зорилготой юм.
Крипто валют нь өндөр хэлбэлзэлтэй, эрсдэл өндөртэй хөрөнгө оруулалтын хэрэгсэл гэдгээрээ алдартай. Тиймээс Их Британийн зохицуулагчид энэ салбарыг хэтэрхий хатуу хориглохын оронд, хяналттай орчинд оруулах нь илүү үр дүнтэй гэж үзэж байгаа бололтой. Хэрэв энэ санал батлагдвал, уламжлалт хөрөнгө оруулалтын сангууд крипто зах зээлд албан ёсоор нэвтэрч, хөрөнгө оруулагчдад илүү олон төрлийн багцыг санал болгох боломж бүрдэх юм.
Энэхүү алхам нь дэлхий дахинд крипто валютын хүлээн зөвшөөрөгдөх байдлыг нэмэгдүүлж, институцийн хөрөнгө оруулагчдын оролцоог идэвхжүүлэх чухал дохио болж байна. Одоогоор FCA-аас энэ талаарх санал бодлоо илэрхийлэхийг салбарын мэргэжилтнүүд болон олон нийтээс хүсээд байгаа бөгөөд эцсийн шийдвэр гарах хүртэл хөрөнгө оруулагчид анхааралтай ажиглаж байна.
Залуу хөрөнгө оруулагчдын хувьд энэ нь санхүүгийн зах зээлд гарч буй томоохон өөрчлөлтийн нэг бөгөөд крипто валютын хөрөнгө оруулалт улам бүр мэргэжлийн түвшинд шилжиж байгааг харуулж байна. Гэсэн хэдий ч аливаа хөрөнгө оруулалт хийхээс өмнө зах зээлийн эрсдэлийг сайтар тооцоолох нь хамгийн чухал хэвээр үлдэнэ.
