Дэлхийн поп хөгжмийн ертөнцийн томоохон төлөөлөгч, “Firework”, “Roar” зэрэг хит дуугаараа танигдсан Америкийн дуучин Кэти Перри өнгөрсөн шөнө Лиссабонд болсон “Rock in Rio” наадмын тайзнаа эргэн ирлээ. Тэрээр энэ үеэр “Watch It Burn” хэмээх цоо шинэ дуугаа анх удаа үзэгчдэд хүргэсэн нь фенүүдийнх нь хувьд гэнэтийн бэлэг байв.
Тоглолтын үеэр дуучин бүсгүй 2025 он түүний хувьд сэтгэл санааны болон уран бүтээлийн хувьд амаргүй жил байсныг илэн далангүй хуваалцсан юм. Тэрээр “Би өөрийнхөө ‘арслангийн архиралт’-ыг (roar) гээчихсэн байсан” хэмээн сэтгэл хөдлөлөөр ярьжээ. Энэ нь түүний 2013 онд гаргасан алдарт “Roar” дууны нэрийг дурссан хэрэг байлаа.
Сонирхолтой нь, Кэти Перри энэ үдэш 2009 онд яг энэ хотод анхны тоглолтоо хийж байхдаа өмсөж байсан хувцастайгаа тайзнаа гарч ирсэн нь шүтэн бишрэгчдийнх нь сэтгэлийг ихэд хөдөлгөв. Энэхүү үйлдлээ тэрээр өнгөрсөн үеэ хүндэтгэж, шинэ эхлэлийг бэлгэдэж буй хэрэг хэмээн тайлбарласан юм. “Hello Katy Tour”-ын үеийн дүр төрхөө эргэн авчирсан нь түүнийг уран бүтээлийн шинэ шатанд гарахыг зорьж буйг илтгэх мэт.
Кэти Перри бол сүүлийн хорин жилийн турш дэлхийн поп хөгжмийн ертөнцийг өнгөлж ирсэн, олон арван хит дуу, сүртэй тайзны үзүүлбэрээрээ танигдсан уран бүтээлч билээ. Түүний энэхүү эргэн ирэлт нь хүнд хэцүү үеийг даван туулж, дахин өөрийн гэсэн өнгө төрх, эрч хүчээ олж авч буйн баталгаа болж байна.
