Дэлхийн поп хөгжмийн ертөнцийн амьд домог, дуучин Мадонна Брүүклин хотод болсон алдарт DJ Мартин Гарриксийн тоглолтын үеэр шүтэн бишрэгчдээ гайхшрууллаа. Поп хөгжмийн хатан хаан гэгддэг Мадонна энэ үеэр "Bizarre" хэмээх цоо шинэ дуугаа анх удаа олон нийтэд сонсгосон нь үзэгчдийн дунд том хүлээлтийг үүсгээд байна.
Нидерландын алдарт DJ бөгөөд продюсер Мартин Гаррикс нь цахим бүжгийн хөгжмийн (EDM) ертөнцийн хамгийн нөлөө бүхий уран бүтээлчдийн нэг юм. Түүний тоглолтын үеэр Мадонна гэнэт гарч ирсэн нь Брүүклиний үзэгчдэд мартагдашгүй мөчийг бэлэглэв. Энэхүү шинэ уран бүтээл нь Мадоннагийн удахгүй гарах "Confessions II" цомогт багтах ажээ. Түүний 2005 онд гаргасан "Confessions on a Dance Floor" цомог нь дэлхий даяар асар их амжилт олж, бүжгийн хөгжмийн сонгодог бүтээл болж байсан тул шинэ цомог нь шүтэн бишрэгчдийнх нь дунд маш өндөр хүлээлттэй байна.
Мадоннагийн хувьд өөрийн хэв маягийг үргэлж шинэчлэн, хөгжмийн ертөнцөд чиг хандлага тогтоосоор ирсэн туршлагатай уран бүтээлч билээ. "Bizarre" дууны хувьд Мартин Гарриксийн эрч хүчтэй хэмнэлтэй хослон, орчин үеийн поп болон бүжгийн хөгжмийн төгс зохицлыг харуулж байна. Шинэ цомгийн талаарх албан ёсны мэдээлэл хараахан гараагүй байгаа ч, энэхүү гэнэтийн үзүүлбэр нь түүнийг эргэн ирэлтэд бэлэн байгааг батлан харууллаа.
