Их Британийн алдарт “The Smiths” хамтлагийн гоцлол дуучин, рок хөгжмийн ертөнцийн маргаан дагуулсан эрхэм Моррисси дахин нэгэн дуулианы эзэн боллоо. Саяхан цахим сүлжээнд “The Malefactors” буюу “Муу санаатнууд” нэртэй жагсаалт тархсан бөгөөд уг жагсаалтад дуучны үзэн яддаг гэгдэх хүмүүс болон улс орнуудын нэрс багтжээ.
Уг жагсаалтад түүний хуучин хамтрагч, гитарчин Жонни Марр гурван ч удаа бичигдсэнээс гадна улс төрч Найджел Фараж, “IDLES” хамтлагийн дуучин Жо Талбот, реппер Машин Ган Келли, бүр цаашлаад “Twilight” киноны Эдвард Каллен болон хүүхэлдэйн киноны дүр Лиза Симпсон хүртэл багтсан нь олон нийтийн дунд ихээхэн инээдмийн эх үүсвэр болсон юм. Гэвч Морриссигийн баг үүнийг зүгээр нэг шоглоом гэж хүлээж авсангүй.
Мэдээллийн эх сурвалжуудын мэдээлснээр, дуучны баг уг жагсаалтыг цахим сүлжээнээс устгуулах арга хэмжээ авч эхэлсэн байна. Энэхүү үйлдлийг олон нийт дуучныг хэтэрхий мэдрэг, өөрийнх нь нэр хүндэд халдсан аливаа шоглоомыг тэвчдэггүй зангийн илрэл хэмээн шүүмжилж байна.
Жагсаалтад нэр нь орсон хүмүүсийн нэг, “R.E.M.” хамтлагийн гишүүн Майк Миллс энэ талаар өөрийн байр суурийг илэрхийлэхдээ “Би энэ жагсаалтад багтсандаа нэг талаар бахархаж байна” хэмээн ёжтой хариу барьжээ. Одоогоор Морриссигийн зүгээс уг жагсаалт албан ёсны эсэх талаар албан ёсны тайлбар хийгээгүй байгаа ч, түүнийг тойрсон энэхүү үйл явдал сошиал медиа хэрэглэгчдийн дунд эрчимтэй хэлэлцүүлэг өрнүүлсээр байна.
