АНУ-ын Нью-Йорк хотын алдарт “Madison Square Garden” цэнгэлдэх хүрээлэнд болсон “Goose” хамтлагийн тоглолтын үеэр аюулгүй байдлын ноцтой осол гарчээ. АНУ-д маш их нэр хүндтэй, импровизаци буюу тухайн агшинд хөг аялгууг зохион тоглодог онцлогтой “Goose” хамтлагийн энэхүү тоглолт тасалбар нь бүрэн зарагдаж, үзэгчдээр дүүрэн байсан юм.
Цагдаагийн байгууллага болон зохион байгуулагчдын мэдээлснээр, 51 настай эрэгтэй үзэгчдийн суудлын өндөрлөг хэсгээс доош унасны улмаас газар дээрээ нас баржээ. Уг явдлын дараа хамтлагийн зүгээс албан ёсны мэдэгдэл гаргаж, “Энэхүү харамсалтай үйл явдлыг сонсоод бид маш их цочирдож, зүрх шимширч байна” хэмээн эмгэнэл илэрхийлсэн байна.
Одоогийн байдлаар хууль сахиулах байгууллагууд ослын шалтгааныг тодруулахаар мөрдөн шалгах ажиллагааг үргэлжлүүлж байгаа бөгөөд тухайн хүнийг өндрөөс унахад хүргэсэн нөхцөл байдлыг нарийвчлан судалж байна. “Madison Square Garden” бол дэлхийн хамгийн том тайзнуудын нэг бөгөөд ийм төрлийн олон нийтийн арга хэмжээний үеэр аюулгүй байдлын дүрэм журам маш чанга байдаг хэдий ч энэ удаагийн эмгэнэлт явдал шүтэн бишрэгчдийг нь гүн цочролд орууллаа.
“Goose” хамтлагийн хувьд энэ нь тэдний карьерын хамгийн том тоглолтуудын нэг байсан ч ийнхүү харамсалтайгаар өндөрлөв. Одоогоор хамтлагийн цаашдын тоглолтын хуваарьт өөрчлөлт орох эсэх талаар албан ёсны мэдээлэл гараагүй байна.
