Панк рок хөгжмийн ертөнцөд хувьсгал хийсэн, Нью-Йорк хотоос гаралтай Рамонес (The Ramones) хамтлагийн анхны цомог худалдаанд гарсаны 50 жилийн ой энэ жил тохиож байна. Энэхүү түүхэн үйл явдлыг тохиолдуулан хамтлагийн эрх бүхий төлөөлөгчид нэг жилийн турш үргэлжлэх томоохон хэмжээний баяр ёслолыг зарлалаа.
Баяр ёслолын хүрээнд Рамонес хамтлагийн хамгийн алдартай бүтээлүүд шинэчлэгдэн дахин худалдаанд гарах юм. Ялангуяа, хамтлагийн фэнүүдийн дунд хамгийн их хүлээлт үүсгээд байгаа зүйл бол хамтлагийн клип болон тоглолтын бичлэгүүд өндөр нягтралтайгаар сайжруулагдан гарах явдал юм. Энэ нь залуу үеийн хөгжим сонирхогчдод Рамонесын эрч хүчтэй, хэзээ ч хуучрахгүй хөгжмийг илүү чанартайгаар мэдрэх боломжийг олгоно.
Түүнчлэн, Лас Вегас хотын Панк Рок Музейд долдугаар сарын 4-нд Рамонес хамтлагт зориулсан тусгай үзэсгэлэн нээгдэх гэж байна. Үзэсгэлэнд хамтлагийн түүхэн замнал, хөгжмийн зэмсэг, тайзны хувцас, ховор гэрэл зургууд болон бусад үнэт үзмэрүүд дэлгэгдэх аж. Энэхүү үзэсгэлэн нь Рамонесын фэнүүд болон панк рок хөгжмийн түүхийг сонирхогч хүн бүрт зориулагдсан гайхалтай боломж юм.
Рамонес хамтлаг нь 1974 онд Нью-Йорк хотод байгуулагдсан бөгөөд панк рок хөгжмийн үндэслэгчдийн нэг гэж тооцогддог. Тэдний хурдан хэмнэлтэй, энгийн хэрнээ эрч хүчтэй хөгжим нь дэлхий даяар олон сая фенүүдийг бий болгосон. Тэдний нөлөө нь олон арван жилийн турш үргэлжилж, олон зуун хөгжимчдөд урам зориг өгсөөр байна.
Рамонесын 50 жилийн ойн баяр нь панк рок хөгжмийн соёлыг дахин нэг удаа дэлхий даяар сурталчлах, хамтлагийн гайхамшигт өвийг залуу үед таниулах чухал ач холбогдолтой үйл явдал болно гэдэгт итгэлтэй байна.
