Дэлхийн крипто зах зээлийн гол тоглогч болох АНУ-ын Холбооны нөөцийн сан, Сангийн яам болон бусад зохицуулагч байгууллагууд стейблкойн буюу тогтвортой ханштай крипто валютын гүйлгээнд хяналтаа чангатгах шинэ алхам хийж байна. Энэхүү санаачилга нь "GENIUS Act" нэртэй хуулийн төсөлтэй холбоотой бөгөөд гол зорилго нь стейблкойн ашиглагчдыг уламжлалт банкны харилцагчидтай ижил түвшний танилт, баталгаажуулалтын системд хамруулах явдал юм.
Одоогийн байдлаар стейблкойн нь крипто зах зээл дээрх хамгийн эрэлттэй хэрэгсэл бөгөөд ам.доллартай ханшаа уялдуулдаг онцлогтой. Гэвч зохицуулагчид үүнийг мөнгө угаах, хууль бус санхүүгийн үйл ажиллагаанд ашиглахаас сэргийлэхийн тулд "Харилцагчаа таньж мэдэх" (KYC - Know Your Customer) стандартыг заавал мөрдүүлэх шаардлагатай гэж үзэж байна. Энэ нь энгийнээр хэлбэл, та стейблкойн ашиглахдаа банкны данс нээлгэхтэй адил хувийн мэдээллээ бүрэн баталгаажуулах шаардлагатай болно гэсэн үг юм.
Энэхүү санал болгож буй дүрэм нь одоогоор олон нийтийн хэлэлцүүлгийн шатанд байгаа бөгөөд салбарын мэргэжилтнүүд болон крипто хөрөнгө оруулагчдын зүгээс ихээхэн анхаарал татаж байна. Хэрэв энэ дүрэм албан ёсоор батлагдвал, крипто биржүүд болон стейблкойн гаргагч компаниуд үйлчлүүлэгчдийнхээ мэдээллийг илүү нарийн нягталж, хууль сахиулах байгууллагуудтай хамтран ажиллах үүрэг хүлээх юм.
Зарим шинжээчид энэ алхмыг крипто зах зээлийг илүү найдвартай, институцийн түвшинд хүлээн зөвшөөрөгдөхөд тусална гэж үзэж байгаа бол нөгөө хэсэг нь энэ нь крипто валютын гол давуу тал болох "төвлөрсөн бус байдал" болон "хувийн нууцлал"-д сөргөөр нөлөөлнө хэмээн болгоомжилж байна. Юутай ч, крипто ертөнц уламжлалт санхүүгийн системтэй улам бүр ойртож, зохицуулалтын хүрээ тэлсээр байгаа нь тодорхой байна.
