Цахим бүжгийн хөгжмийн ертөнцийн загалмайлсан эцэг гэгддэг Британийн алдарт DJ, продюсер Карл Кокс Их Британийн хаан III Чарльзын төрсөн өдрийн хүндэтгэлийн жагсаалтад багтаж, “Order of the British Empire” (OBE) одонгоор шагнууллаа. Энэхүү нэр хүндтэй шагналыг түүний хөгжмийн салбарт оруулсан үнэлж баршгүй хувь нэмэр болон олон жилийн турш хичээнгүйлэн хөдөлмөрлөснийг нь үнэлэн олгож байна.
Карл Кокс бол 1980-аад оноос хойш өнөөг хүртэл дэлхийн электрон хөгжмийн тайзнаа ноёрхож буй цөөхөн уран бүтээлчдийн нэг юм. Тэрээр Ибица арлын алдарт шөнийн клубуудэд олон жилийн турш хөгжим тавьж, “техно” хөгжмийг дэлхий даяар түгээн дэлгэрүүлэхэд гол үүрэг гүйцэтгэсэн билээ. Түүний хөгжмийн мэдрэмж, тайзан дээрх эрч хүчтэй байдал нь сая сая залуусын шүтээн болсон бөгөөд тэрээр зөвхөн DJ төдийгүй хөгжмийн салбарын томоохон нөлөөлөгч юм.
Хааны төрсөн өдрийн энэхүү жагсаалтад Карл Коксоос гадна хөгжмийн салбарын хэд хэдэн нөлөө бүхий эрхмүүд багтсан байна. Энэ нь электрон хөгжим болон DJ соёл нь зөвхөн зугаа цэнгэл бус, харин соёл урлагийн томоохон салбар болон хөгжсөнийг албан ёсоор хүлээн зөвшөөрч буй хэрэг хэмээн хөгжмийн шүүмжлэгчид онцолж байна.
Өдгөө 60 гаруй насны босгыг давсан ч Карл Кокс өнөөдрийг хүртэл дэлхийн томоохон хөгжмийн наадмуудын гол хөтөлбөрт багтсаар байгаа нь түүний энэ салбарт хэр их нөлөөтэйг илтгэнэ. Түүний энэхүү амжилт нь залуу үеийн уран бүтээлчдэд урам зориг өгөх нь дамжиггүй.
