Францын электроник хөгжмийн алдарт Justice хамтлаг удахгүй нээлтээ хийх Grand Theft Auto VI тоглоомын орижинал хөгжмийг бүтээсэн болохыг хэвлэлийн мэдэгдлээр баталлаа. Өнгөрсөн наймдугаар сард гарсан “Grand Theft Auto VI: An Extended Look” танилцуулга болон бусад томоохон зарлалуудын үеэр сонсогдсон аялгууг тус дуэт зохиосон гэх цахим орчны яриа ийнхүү батлагдсан байна.
Энэхүү мэдээтэй зэрэгцэн Justice хамтлаг “Flower in a Hurricane” нэртэй шинэ синглээ цацлаа. Уг бүтээлд Грэммийн шагналт Tame Impala, SZA болон саяхан “Alien Metal” цахим цомгоо гаргасан “King Gizzard & The Lizard Wizard” хамтлаг хамтарчээ. “Dire Straits” хамтлагийн “Money for Nothing” дууг санагдуулам эхлэлтэй уг дуу нь Justice болон Tame Impala нарын өмнөх амжилттай хамтрал болох Грэммийн шагналт, Billboard-ийг тэргүүлсэн “Neverender” дууны дараах шинэ уран бүтээл болж байна.
Ингэснээр Justice хамтлаг GTA VI тоглоомд оролцож буй шилдэг уран бүтээлчдийн эгнээнд нэгдэж байгаа юм. Тоглоомыг бүтээгч Rockstar Games есдүгээр сард хийсэн мэдэгдэлдээ саундтрект нийт 34 шинэ дуу багтана гэж зарласан билээ. Үүнд Yung Lean, Future, Metro Boomin нарын “That’s It”, Travis Scott-ийн “Rhyno” (продюсероор Дафт Панкийн Guy-Manuel de Homem-Christo болон CA7RIEL & Paco Amoroso ажилласан), PinkPantheress, Fred again.., Étienne de Crécy нарын хамтарсан “Sexy Magic” зэрэг бүтээлүүд багтаж байна. Түүнчлэн Морган Уоллений “The Last Thing You Need”, Рау Алехандрогийн “Macacoa 2000”, Кит Ричардсын “Bright Lights, Big City” зэрэг дуунууд багтжээ.
Rockstar Games-ийн бүтээл “Grand Theft Auto VI” тоглоом 11 дүгээр сарын 19-нд албан ёсоор худалдаанд гарна.
