АНУ-ын поп дуучин Грейси Абрамс өөрийн гурав дахь студийн цомог болох «Daughter From Hell»-ийг албан ёсоор танилцууллаа. Энэхүү цомог нь 2024 онд Billboard 200 жагсаалтын хоёрдугаар байрт бичигдэж байсан «The Secret of Us» цомгийн үргэлжлэл юм.
Дуучин бүсгүй шинэ цомгийнхоо нээлтийн хүрээнд NBC телевизийн «The Tonight Show Starring Jimmy Fallon» нэвтрүүлэгт оролцож, цомогт багтсан «Minibar» дуугаа хамтлагийнхаа хамт амьдаар дуулж сонирхууллаа. Нэвтрүүлгийн үеэр тэрээр шинэ цомгийнхоо бүтээлч үйл явцын талаар ярихдаа, хамтран ажилласан баг хамт олондоо талархаж буйгаа илэрхийлсэн юм.
Мөн Грейси Абрамс удахгүй жүжигчний гараагаа эхлүүлэх гэж байгаагаа баталлаа. Тэрээр «Babygirl» киноны найруулагч Халина Рейнийн шинэ бүтээлд дүр бүтээхээр төлөвлөж байгаа аж.
Цомгийн нэр болох «Daughter From Hell»-ийн тухайд тэрээр энэ нь өөрт нь хамаатай гэдгийг онцолжээ. "Энэ дуу бол цомогт зориулж бичсэн хамгийн сүүлийн дуу бөгөөд ээждээ олон жилийн өмнө хэлэх ёстой байсан уучлалт, талархлын захидал юм" хэмээн тэрээр ярьсан байна. Тэрээр өөрийгөө хүүхэд байхдаа хэцүү зан араншинтай, тэрслүү нэгэн байсан гэдгээ хүлээн зөвшөөрсөн ч энэ нь эцэг эхийнхээ хувьд бага зэргийн "шуугиантай" үе байсныг дурджээ.
Түүнчлэн Грейси Абрамс удахгүй эхлэх «The Look at My Life» аялан тоглолтынхоо талаар ярихдаа, өмнөхөөсөө илүү шинэлэг, хамгийн анхны шатнаас нь эхлүүлж буй мэт сэтгэгдэл төрүүлж буйг хуваалцлаа. Түүний Хойд Америк дахь аялан тоглолт 12-р сарын 2-нд Денвер хотоос эхлэх юм.
