Тоглолт, арга хэмжээ зохион байгуулагч AEG Presents компани Техас мужийн Остин хотод байрлах 4,000 хүний суудалтай шинэ тоглолтын танхим болох United Heritage Hall төслийг албан ёсоор зарлалаа. Тус орчин үеийн танхим нь 2027 оны хавар ашиглалтад орохоор төлөвлөгдөж байна.
Энэхүү төслийг AEG Presents компани нь Westfield, Partners Group болон Presidium компаниудтай хамтран хэрэгжүүлж байгаа юм. Ойролцоогоор 65,000 хавтгай дөрвөлжин фут талбай бүхий тус танхим нь Остины Riverside дүүрэг дэх 109 акр талбайг хамарсан River Park цогцолборын гол бүрэлдэхүүн хэсэг болох аж. Энэ нь хотын төв болон Остин-Бергстром олон улсын нисэх онгоцны буудлаас хэдхэн минутын зайд байрлах юм.
AEG Presents-ийн мэдээлснээр уг танхимын загвар дизайныг 1920-иод оны Art Deco хэв маягаас санаа авч бүтээх бөгөөд ирээдүйн өнгө төрхийг шингээхээр зорьжээ. Түүнчлэн хамгийн сүүлийн үеийн дуу чимээ, гэрэлтүүлгийн төхөөрөмж, үзэгдэх орчин сайтай суудал, тансаг зэрэглэлийн өрөөнүүд болон уран бүтээлчдэд зориулсан тусгай талбайтай байх юм.
Төслийн нээлтийн тоглолтууд болон тасалбарын талаарх дэлгэрэнгүй мэдээллийг дараа зарлахаар төлөвлөжээ.
